ايه الفرق بين 5G و 5GHz و 2.4GHz ....؟
السلام عليكم
من فترة بدأ نزول العديد من اجهزة الرسيفر الى بتدعم 5GHz
ورغم ان الاضافة ليست جديدة اطلاقا وموجوده فى اجهزة منذ سنين
مثلا رسيفر ايكون ايرون برو موجودة فيه منذ تصنيعه من حوالى 6 او 7 سنين
ولكن مؤخرا بدأت تنتشر الميزة فى اغلب اجهزة الرسيفر سواء الاندرويد او حتى غير الاندرويد
مش كده بس , ده حتى الاجهزة العادية اصبح بكل سهوله سهل تشغيلها على 5GHz بمجرد توصيل انتينا تدعم 5GHz
لغاية هنا مفيش مشكلة
ولكن مع الاخبار المتداولة من فتره عن توفير رخصة 5G لشركات الاتصالات فى مصر
بدأ يحصل عن البعض لبس ولغط كبيرين وحيره مع الرقمين دول
وظهرت تساؤلات عن :-
ايه الفرق بين 5G و 5GHz؟
🟠اولا 5GHz:-
ده تردد من اكتر من ترددات موجودة لتشغيل شبكات WI-FI والمتوفرة في اغلب الاجهزة حاليا
(موبايل, رسيفر, تلفزيون , وغيرهم ) من الاجهزة اللى بتتصل بالإنترنت عن طريق WI-FI
ومن اشهر الترددات انتشارا 2.4 جيجا هرتز و 5 جيجا هرتز
طيب ايه الفرق بين 2.4 جيجا هرتز (التردد القديم) و 5 جيجا هرتز (التردد الجديد)
🌐 تردد 2.4 جيجا هرتز:
✅ بيكون اقل بكتير فى سرعة نقل البيانات ولكن بيكون افضل كتير فى المساحة الكبيره اللى بيقدر يغطيها ويوصل اليها
✅ كمان بيكون افضل فى اختراق الاجسام الصلبه زى الجدران اواى عوائق فى نطاق التغطية
🌐 تردد 5 جيجا هرتز:
✅ بيوفر سرعة نقل بيانات اعلى بكتير ولكن نطاق تغطيته بيكون اقل بكتير من 2.4 وكمان اقل قدرة على اختراق العوائق
ولازم نذكر ان اقصى سرعة نقل البيانات فى 2.4 بتصل الى 450 ميجا فى الثانية
انما 5 جيجا هرتز بتصل الى 1.3 جيجا فى الثانية
اكثر من ضعف السرعه تقريبا
ــــــــــــــــــــــــــــــــــــــــــــــــــــــــــــــــــــــــــ
طيب احنا كمستخدمين اجهزة رسيفر تدعم 5 جيجا هرتز ازاى ممكن نستفيد منها ؟
اولا :لازم يكون عندك راوتر يدعم 5GHz وده بقى متوفر بكثره وسهوله حاليا
ولكن للاسف.....!!!
سرعات الانترنت المتوفره حاليا( فى مصر) لا تصل حتى الى 450 ميجا نهائيا
ومعنى كده انك سواء اتصلت مع الراوتر عن طريق 2.4 او 5 فى النهاية مش هتحس بفرق نهائيا فى سرعة الانترنت
لان السرعه المتوفرة فى الراوتر اقل بكتير من الحد الاقصى لتردد 2.4 حتى
فقط تقدر تستفيد بكل ده لو سرعة الانترنت عندك فوق 450 ميجا
وقتها هتقدر تتصل بالانترنت مع سرعات اعلى بكتير عن طريق 5GHz
ــــــــــــــــــــــــــــــــــــــــــــــــــــــــــــــــــــــــــ
وفى جميع الاحوال
جميع الخدمات مش هتبقى محتاجه السرعات العالية ويكفيها جدا السرعات الحالية بشرط استقرار الاتصال والانترنت سواء شيرنج او صوتيات او ايبى
كل الخدمات دى مع سرعة تصل الى 100 ميجا ومستقرة وثابته هتعمل بكل ثبات واستقرار
ــــــــــــــــــــــــــــــــــــــــــــــــــــــــــــــــــــــــــ
🔵اما بقى 5G
دى خاصة بشبكات المحمول واللى منتشره فى كل مكان فى العالم وبتتميز انها بتقدر تغطى مساحه شاسعة
وطبعا سرعة نقل البيانات فيها حاجه تانيه خالص لانها بتوصل الى 20 جيجا فى الثانيه وده رقم كبير جدا
وطبعا بتحتاج شريحة او SIM CARD لاستقبالها
ــــــــــــــــــــــــــــــــــــــــــــــــــــــــــــــــــــــــــ
اخيرا
زى ما بنقول دايما الافضل هو التوصيل من خلال الكابل
ولو مش متاح التوصيل بالكابل والراوتر عندك والرسيفر يدعمان 5GHZ
فلو المسافة بين الراوتر والرسيفر اقل من 10 متر والاشارة واصلة بشكل قوى فتقدر تعمل الاتصال على 5GHZ
لو المسافه اكبر من 10 متر وموجود جدران والاشارة واصلة ضعيفه يبقى خليك على 2.4GHZ افضل
By - Amr Hussein
تحتاج إلى تسجيل الدخول لعرض هذه الميزة
سيتم إزالة هذا العنوان من هذه القائمة
عربي
